新書分享 《致間生──孤獨時代嘅哲學旅程，由荒謬走向自由……》

📖 《致間生──孤獨時代嘅哲學旅程，由荒謬走向自由……》

「人生如逆旅」？從蘇軾跌盪起伏嘅人生，反思莊子「逍遙」嘅內涵

牛哥 @cowgortalk

入世讀儒家、出世讀道家，似乎已經成為咗我哋嘅常識——蘇軾早年投身官場，豪情壯志，上京參加禮部秋試，中舉第二年以〈省試刑賞忠厚之至論〉，獲得歐陽修大大賞識。到晚年頻頻以詩作寄語灑脫。彷彿佢嘅人生，就係從儒入道嘅代表。

其實，即使蘇軾再輕盈、再灑脫，佢只係心態上放輕，但志向從未消失。當我哋閱讀佢對歐陽修嘅思念、對莊子嘅理解，就會發現以「出世」嚟理解道家精神，未免過於片面。

我哋會以蘇軾人生作為引介，進一步以徐復觀嘅文本考據，了解「逍遙」二字嘅重量，以及佢話莊子係「古代以仁心為基底的偉大自由主義者的另一思想形態」嘅原因何在。